Ciidamada Itoobiyaanka ay jirdil u geysteen dadka la socda gaadiid 

buluugleey April, 8, 2005

Gaadiid ay iska leeyihiin dad soomaali ah oo in muddo ah ba lagu haystay
guudaha Itoobiya ayaa iminka lagu soo waramayaa in cadaadis dheeraad ah
ay saareen ciidamada Itoobiya  gaadiidkaasoo yaala Degmada Baareey ee
kilinka shanaad ee is maamulka soomaalida.
Gaadiidkan ayey ciidamada taayarada ka furfureen shaagagii ama
taayaradii  kadib markii ay  soo baxsadeen ilaa 9 gaari oo xamuul ah oo
qayb ka ahaa gaadiidkan .
Lama garanayo sabata dhabta ah ee loo haysto gaadiidkan muddo hal bil ku
dhaw iyadoo darawaladii wadayna ay  ka cabanayaan dhibaatooyin  ku
heysata halkaasi iyagoo sheegay in ay ka go'day sahaydii ay wateen iyo
Itoobiyaanka oo diiday lacagtii Shilin Soomaaliga ahayd.
Warar xoog ogaal ah ayaa sheegaya in sarkaalka ugu sareeya ee ciidamada
Itoobiyaanka ee xayiray gaadiikaasi  uu soo saaray shalay go'aan ah in
gaadiidka loo kala sooco Muqdisho iyo meelaha kale ee laga leeyahay,
hasayeeshee aan sinaba lagu sii deyn doonin kuwa ka yimid Muqdisho,
lana sii daayo gaadiidka kale ee laga lee yahay gobolada kale ee
Soomaaliya.
Wararka qaar ayaa waxa ay sheegayaan in ciidamada Itoobiyaanka ay jirdil
u geystaan dadka la socda gaadiidkaasi gaar ahaan kuwa darawaliinta ah
inkastoo warkaasi aysan jirin cid madax banana oo xaqiijin karta.
Todobaadkii hore ayey ahayd markii sagaal baabuur oo soo baxsady ay soo
gaareen magaalada Beledweyne, wallow baxsashada gaadiidkan qaarkood la
sheegay in lagu soo daayey musuqmaasuq iyo laaluush lakala qaatay.

Cabdi Maxamed Ismacil ( Cabdi-Cuud)